NOZZE DEL SESSANGENARIO
Per le faustissime nozze del sessagenario
sig.r N.N. colla sig.na N.N. giovane d'anni 30
Fioeuj, vedii quell vecc inscirotta
ch'el va adasi tant quand l'andass sul veder,
che a on mascaree el porrav servì de meder
per el mostacc mezz gris e reffignaa?
Aben par sessant'agn bej e sonaa
squas el sia in man di pever de sant Peder
el se ressent incoeu de fà el poleder
e de fà corr par cà baila e comaa;
e sposand ona tosa de trent'agn
el se cred ai parent de fagh la fricca
e cont on bell baciocch da traj de scagn.
Consolev parò in mezz a sto sò acquist
che stand lontan de cà el fraa della micca
par soa part semm segur dell'Antecrist.
