INFERNO CANTO II
Traduzione dall'Inferno di Dante - Canto II
Vegneva innanz la nocc de maneman
che el dì el ghe renunziava el sò possess.
Tucc dormiven: né gh'eva in tutt Milan
fors gnanch cent lengu de donn che se movess:
domà mì serva in pee tra tanc sognan
su ona strada mal conscia e che fa s'cess,
pareggiaa a tucc quij guaj che sentirii
fedelment reportaa in cant trentatrii.
Musa, che in grazia tova da fioeu
hoo tolt su dal majester de gramatega
on brovett de sardell e de pignoeu,
no me fà com'el solet la lunatega,
chè el dì da compensamm l'è quell d'incoeu.
Cuntem tì i pee di vers che te see pratega;
e tì marmoria fa el tò spicch anch tì,
che cont di oeuv fresch te aiutaroo anca mì.
