LETTERA A UN AMIS
Sont staa in lecc des dì filaa
con la gotta in tutt duu i pee,
hoo traa sguagn, hoo bestemma
per dò milla carrocciee.
Gh'eva i did besinfi e gross
che pareven tanc bojocch,
e on dolor dent per i oss,
on dolor, t'el digh mì Rocch!
Gh'eva i ong di duu didon
foeura affacc de simetria,
destaccaa ai quatter canton
asquas lì de boffà via,
e la pell rossa infogada
come i facc di bretador
l'eva asquas pussee tirada
che nè quella di tambor.
Sott aj ong, sott alla pell,
gh'eva picch perzipitos
e ghe n'eva quell sfrasgell
che gh'è in Domm a Santa Cros.
