RIVI DE BARLASSINA
Rivi de Barlassina appenna adess
dove son staa dò nocc e tutt on dì
e de asnitt d'ogni etaa, de tucc i sess
n'hoo vist on milla senza cuntamm mì.
Eppur, per vess tanc asen e per vess
el sò mes de incazziss e de sgarì,
ch'eel che no eel, scior mio, resti de gess:
vun che l'è vun no l'hoo sentii a zittì.
Se nol fudess che soo coss'hin i asen,
besti goff, incapazz de riflession,
che no san perchè raggen, perchè tasen,
podeva fors anch ess che ghe insegnass
a sciarnì foeura on contrattemp pù bon
de sospend i soeu vers per reposass.
Chè mì serva là a spass
e minga per sgonfiamm i zebedee
de supplì ai soeu versori cont i mee.
